الأربعاء، 17 أغسطس 2011

اعادة النيل للحياة


جسمنا بيتكون من سبعين فى المية ماية وده للبشر العاديين
واحنا كمصريين جسمنا بيتكون من سبعين فى المية مجارى وكلور ومواد تانية عجيبة لاننا متوصيين اوى بالنيل مش مكفينا ان الصرف الصحى بيصب فيه لا كمان بنرمى فيه زبالتنا واحنا نشرب
ولو قولت انك مش هتشرب من ماية النيل فغصب عنك هتاكل من الزرع اللى اتسقى بماية النيل
طب ليه بنتعامل مع النعمة بالغباوة دى؟؟؟؟




ده نيل مش ترعة ومصرف ليه يبقى كده وليه ساكتين على كده؟؟؟؟؟
عندى اقتراح يمكن يحل المشكلة دى مشروع قومى لاعادة الحياة للنيل
هيكون فيه توعية وتوصيل ماية للمناطق الفقيرة وتنقية لماية النيل وشاركة مع جهات كتيييييير
ويبدا التنفيذ فى يوم وفاء النيل

اولا التوعية الاعلامية
فى اليوم ده هنقف على كونيش النيل فى كل محافظات مصر رافعين لافتات زى "معا لاعادة النيل للحياة - انا مصرى ومش هلوث النيل" وعبارات زى كده
وده يكون لفت نظر للراجل العادى انه ماعدش ينفع نعمل كده وده لما يبقى فى كل مصر المنظر هيهز حاجة جوه الناس بحيث انه لو مشى عالكرونيش وفى ايده علبة كان او ورقة حتى يفتكر المنظر فيتكسف على دمه وما يعملش ده تانى

وبالاضافة ده فى نفس اليوم يكون فى ندوة فى كل محافظات مصر عن قيمة النيل وتعريف الناس بالمشروع وتحفيزهم للمشاركة والتبرع ليه

وبرده فى نفس اليوم يكون فيه مواد اعلانية فى التليفزيون تعرض اثر تلوث النيل على صحتنا من فشل كلوى وامراض الكبد ونقول عبارة زى مش هلوث النيل ومش هكون سبب فى موت انسان
كمان تكون فيه اغنية عن النيل او حتى اوبريت من مجموعة مطربين
ونصور مع مجموعة من المشاهير فنانين مطربين مذيعين يعلنوا تضامنهم مع المشروع ومشاركتهم فى وقفة التوعية
وبره نكتب سيناريو بسيط لكام فيديو ونرفعهم عالفيس بوك تعرض صور للزبالة اللى فى النيل

ده فى اول يوم بالنسبة للتوعية
تانى يوم فى كل محافظات مصر هتكون الجمعية المسئولة عن تنفيذ النشاط حددت منطقة مش بيوصلها ماية وتبدأ فى عمل توعية للاهالى بحيث نقضى على السلوك ده تمام ونبدأ فى عملية التوصيل

خصلت المرحلة دى نيجى على اهم مرحلة اكيد مش هينفع نسيب النيل بتلوثه كده لازم ننقيه

ده فيديو بيشرح طريقة بسيطة جدا عاملتها تركيا لتنقية مياة الخليج والاستفادة من المخلفات
http://www.youtube.com/watch?v=gBYVPq_GzNY

مين بقى اللى هينفذ كل ده؟؟
الجمعيات الخيرية زى جميع فروع جمعية رسالة وصناع الحياة ومصر الخير واى جمعية خيرية فى اى محافظة
وممكن المحافظة الواحدة يشترك فيها اكتر من جميعة لان ده مشروع قومى
دى الجمعيات اللى هتمد المشروع بالشباب اللى هينفذ

الدعم المالى ممكن شركات الموبايل واساسا شركة اتصالات بتعمل حاجة زى كده ومشتركة مع جمعية رسالة
وممكن يكون فى رقم حساب لجمع التبرعات
كمان هيكون فى شراكة مع منظمة اليونيسيف ووزارة البيئة ووزارة الصحة
الدعم محتاجينة فى الدعايا التليفزيونية وفى توصيل المياة للمناطق وفى عملية التنقية وكمان وقف صب الصرف الصحى فى النيل

طب ازاى هنوصل لده؟
اولا نعمل مقترح محترم للفكرة فيه الرؤية والرسالة والاهداف وكيفية التفيذ ونعرضه على فرع جمعية رسالة الرئيسى ولما يوافقوا عليه نبدأ نروح الجمعيات والمنظمات التانية
ونبدأ بقى فى تجهز الدعايا الاعلامية
وتحديد المناطق اللى هنشتغل فيها

وبس
فكرة بسيطة وبديهية ومش مفتكسة بس محتاجة جدية
مين يشترى؟؟



الجمعة، 14 مايو 2010

فكرة مش مفتكسة

فكرة المرة دى بسيطة جداااا ومش افتكاسة ولا حاجة غير طبيعية

لكن فى البداية هفضفض معاكم عشان قبل الفكرة لازم تكونوا حاسين بالمشكلة

مؤسسات الرعاية

سواء كانت مؤسسات لرعاية الايتام او ذوى الاحتياجات الخاصة او الاحداث او اطفال الشوارع
اى مؤسسة رعاية اطفال

اغلب المؤسسات دى بتركز اهتمامها على تلبية حاجات الاطفال المادية وبتهمل الجانب العاطفى

فالطفل بيعانى من الحرمان العاطفى اللى بيؤدى فيما بعد الى جنوح وانحراف الفرد ده

ووارد انه يتحول لمجرم

معظم العاملين فى المؤسسات دى بيعانوا من الجهل التربوى ومافيش ادنى ثقافة للتعامل مع الانماط المختلفة للاطفال

والمفروض ان مش اى حد يتعين داخل دور الرعاية دى لازم يكون مدرب كويس جدا ومؤهل

ومش اى حد يصلح لقيام بدور الام البديلة

فى مؤسسات الامهات فيها مش ماعندهمش ثقافة تربوية لا دول اميين محتاجين يتعلموا

ولازم يبقى فى رقابة واشراف على دور المؤسسة فى تلبية حاجات الاطفال معنوية

لازم اسلوب الرعاية داخل المؤسسات دى يتغير لان فسادها فى تدمير وهدم للمجتمع

الطفل فى المؤسسات دى نظرته لينا هى اننا الالات بتحققه رغباته المادية

العلاقة بيننا وبينه بتكون منفعة مادية

يعنى الطفل مش بيعرف حاجة عن العلاقات الانسانية

هى علاقة هات وخد

فبالتالى هنفضل دايما فى نظره كده اللى بيربطه بينا المنفعة

الطفل لو اتحرم من العاطفة بيكون غير سوى بيحمل مشاعر سلبية للمجتمع مش بيحس بالانتماء ليه بيكره افراد المجتمع
ودى مصيبة

الاطفال دول ممكن يستغلوا اسواء استغلال

الموضوع فى منتهلا الخطورة لازم نفوق ونعمل الحاجة


الفكرة ببساطة ومش محتاجة فتاكة


1- العاملين يكونوا مؤهلين للتعامل مع الاطفال

2- رقابة داخل مؤسسات الرعاية

3- اشعار الطفل بقيمته واهمية دوره داخل المجتمع "ودى اهم حاجة فى الموضوع"

ازاى:

مش صح ان الطفل يحس ديما انه معطوف عليه

وان كل الناس ليهم فضل كبير عليه وهو مدين ليهم

الطفل كمان لازم يعطف

فيها اية لو الاطفال راحوا زاروا اطفال تانين فى مستشفى 57357 مثلا

عشان يحسوا اننا كلنا اخوات فى الانسانية

وان الطفل اليتيم ده او غيره مش حالة خاصة


فيها اية لو يشاركوا فى عمل خيرى

عشان يحسوا انهم جزء من المجتمع

مش معزولين ورا سور ومنبوذين

مش صعب اننا نعمل كده

والفكرة مش مفتكسة


مين هيشترى؟

السبت، 27 فبراير 2010

مش فكرة

هى مش فكرة

بس اقتراح

دلوقتى فى قانون خاص بالمفقودين هو ان

لو حد تاه منك ماتبلغش على اختفائه الا بعد ما يمر يوم

ده بالنسبة للناس الكبار مقبول شوية

انما بالنسبة للاطفال

مش مقبول نهائى

انا كده بدى الفرصة ان الطفل يتخطف او حد يعمل فيه حاجة

يعنى بعمل واجب مع المجرمين

طفل اية اللى هستنى يوم على توهانه

لان فى احتمال انه يكون عند حد من قرايبه

او مستخبى تحت السرير

ماهو انا اكيد مش هبلغ غير لما ادور عليه فى كل حتة

وبفرض ان فى حتمال "نص" % انه يكون حد خطفه ولا استغله ولا ولا

لازم الدنيا تتقلب ده طفل

يعنى فرصة فى النجاة

ما ممكن الطفل اللى سبناه يتوه ده يكون كان مقدره انه يغير حياتنا

لكن لاننا مهملين الطفل ده اتقتل او استغل لتدمير حياتنا

عارفين ان شاء الله لما أأسس جمعية اجيال مصر

او حتى لما نشاط فريق مستقبلنا فى ايد اطفالنا يبدأ

هيبقى فى مجموعة تهتم بالاطفال المفقودين

وهنعمل طلب لمجلس الامومة والطفولة

بتغيير القانون ده

وهنتفق مع الدخلية انهم يتعاونوا معانا

وهنعمل لوحات اعلانية كبيرة عليها صورة الطفل اللى تاه

وهنتفق مع وسائل الاعلام

عشان يعلنوا على الموضوع

وممكن صورة الطفل تنزل على المنتجات الغذائية زى مابيحصل برة

ان شاء الله

هنسوى الهوايل

وان شاء الله ربنا يقدرنى

ان طول مانا عايشة مافيش طفل يعانى من حاجة

"اللهم استعملنى ولا تستبدلنى"

والفكرة دى اللى عايز يشتريها يشتريها

المهم انها تتنفذ


السبت، 4 يوليو 2009

استغلال الانسان

سالخير عليكم جميعا

مشكلتنا الكبيرة اننا نادرا لما بنشغل مخنا

لو شغلناه للحظة هنسوى الهوايل

من ضمن الهوايل اللى هنسويها

وهتكون اول حاجة نفكر فيها هى قيمة الانسان وازاى ممكن استفيد منه وهو عايش وبعد مايموت

الانسان ثروة كبيرة جدا وغالية اغلى من المادة لان لولا الانسان ماكانت المادة

المهم فين هى الفكرة

دلوقتى بلدنا فيها مجرمين كتير

واللى محكوم عليهم بالاشغال الشاقة اكتر

والاشغال الشاقة هى تكسير الحجارة

"ونعم العمل"

طب ماهو بدل مالناس دى توعد تكسر فى الحجارة ماتفهمش ليه

ياخدوهم يزرعوا الصحرا مثلا اهو يبقى عمل شاق ومفيد

او يشغلوهم فى اعمال يدوية بدل مابنستورد السبح من الصين

وبالمناسبة اى حضارة صناعية فى الدنيا قامت على الصناعات اليدوية

لو ينزلوهم ينضفوا الشوارع من الزبالة

او يعلموهم حرفة نجارة مثلا

ويخرج من السجن اوض نوم وسفره نصدرها بره او نتصرف فيها

حتى المساجين تبقى عندهم صانعة يعملوها لما يخرجوا من السجن

ليه مابنستفيدش من الاعداد دى

لما مانستثمرش الانسان

سيبينه كده لاشغلة ولا مشغلة

حاجة عجيبة والله

يارب حد يشترى بقى

الأحد، 28 يونيو 2009

فكرة جديدة

مش لاقية حد دخل قالى انا شارى ولا اى حاجة
ده انا ببيع سمك فى مية
وبلاش كمان
فى حد فى الدنيا بيعمل كده

ما علينا

هغير النشاط يمكن حد يوزه عقله ويشترى

دلوقتى فى ناس قلبها ياعينى مفطور على الناس اللى ساكنة فى عشش وفى الصفيح
لانها فعلا مأساة انسانية وان دلت على شئ تدل لعدم وجود اى احساس
والاحساس نعمة
والاحساس من صفات البشر فده معناه ان السلوك البشرى بيختفى

لان الموضوع ده مش فى منطقة ولا تلاتة ولا اربعة
دول بالالوف

اموت امووووووووووت واعرف فلوس الضرايب بتروح فين
اية اللى بيتعمل بيها يعنى لاشوفت بلاليع جديدة
ولا مدرسة جديدة
دى العيال اعدين فوق بعض فى المدراس
ونفس الموضوع فى المستشفيات
ويقولوا ان فلوس الضرايب بترجع لينا فى خدمات
ومن ساعتها وحالنا بيدهور
ماعلينا
احنا اتفقنا مش هنتكلم فى السياسة

ليه مايفكروش فى مرة واحدة ان الفلوس اللى بتطلع من الضرايب تروح لمشروع اسكانى يسكن البشر دى فى مكان محترم بسيط يعيش فيه انسان

او ياسيدى

الشركات ورجال الاعمال اللى بيعملوا دعايا فى التليفزيون وفى الجرايد بملايين

مايجربوا فى سنة واحدة انهم يحطوا فلوس الدعايا دى لتسكين البشر دول فى مكان ادمى

ومش هيخسروا حاجة خالص لانهم كده او كده وفى كل الاحوال وبالطول وبالعرض بيدفعوا الفلوس دى

ممكن يدفعوها بطريقة تانية فيها انسانية

حل المشكلة مش عويص خالص

لو كان فى قلب واحساس ودم ونخوة وضمير

انما احنا باللى بنعمله ده بنخلق بايدينا قنابل موقوتة

بنزرع جواه كره وكبت وغيظ ممكن ينفجر فينا

وماتبقاش تزعل لو لاقيت بيعمل عمليات ارهابية او بيكسر او بيدمر

وتبقى واحد عايز الضرب لو قولت الناس ماعدتش عندها انتماء

انتماء لمين

وهيتعلموه فين اصلا

ولا انت مش شايف هما عايشين ازاى

المهم اللى تعجبه الفكرة وقرر انه يشتريها

يبقى ينوه ثواب ويوصلها للمسئولين

و

حسبى الله ونعم الوكيل



الخميس، 14 مايو 2009

ان تكون....طفلا


ساعات بتقول ياسلام لو ارجع طفل تانى ايام ماكانت حياتى كلها لعب ولا فى دماغى حاجة ولا هممنى حاجة
المهم العب وخلاص

بس لو فكرت كويس...هتحمد ربنا انك خرجت من المرحلة دى سليم

لانك لو رجعت طفل تانى

هتلاقى والدك ووالدتك برة البيت معظم الوقت ومش هتلاقى اللى يربيك

هتلاقى المدرسة عبارة عن زريبة وانت اسم الله على مقامك انت وزمايلك شوية بهايم والكاو بوى او المدرسين
مدورين فيكم ضرب وشتيمة

واة بقى لو حصل وتوهت من اهلك

يا اما الشرطة هتيجى تاخدك من الشارع بعد سنة من غيابك عن البيت

ماهو اصل القانون بيقولك انه ماينفعش ندور على طفل الا لما يعدى يوم على غيابه لان ممكن يكون عند الجيران
عند حد من قرايبه

"قال يعنى ابوك ماسألش عليك عندهم قبل مايبلغ عن غيابك"


كما لو كان القانون ده معمول علشان فرصتك فى التوهان تبقى اكبر مش علشان يساعدهم انهم يلاقوك

المهم الحمدلله انهم لاقولك يا جدع

برده هتلاقى القسم عبارة عن حظيرة واللى فى القسم هيدوروا فيكم ضرب وشتيمة ويسألوك سؤال مهم جدا
ونبيه جدا:

"انت اية اللى خلاك تسيب اهلك يالا"

وانت اصلا تايه منهم وحتى لو كنت انت اللى سايبهم يبقى هما اللى يضربوا علشان طفشوك من البيت
وفى الاخر هيرحلوك على الاحداث او هيرموك فى اى حتة...

او

ان الناس اللى بتاجر فى الاطفال هتاخدك تسرحك وتعلمك الشحاتة
وفى الاخر هتيجى الشرطة وتقبض عليك وبرده يسألوك السؤال الشهير ويرحلوك فى الاخر على الاحداث...

او

انك هتروح تشتغل فى ورشة وهتطلع عنيك ضرب واهانة ومرمطة مانت مالاكش دية ولا فى حد يسأل عنك
وفى يوم وانت ماشى رايح تجيب حاجة للورشة...هتيجى الشرطة تقبض عليك وهيرحلوك على الاحداث...

او

ممكن يكون حظك كويس شوية وتلاقى حد ياخدك يربيك مع عياله او بمعنى اصح
يستثمرك زى مابيستثمر عياله .... ينزل يشحت بيكم ،ينصب بيكم على الناس ،يبيعكم .... المهم فى الاخر
برده الشرطة هتيجى تاخدك....

او

ممكن تروح ملجأ ويطلع من ضمن 95% من الملاجئ اللى الرعاية فيه على البلاط
ضرب وشتيمة والفاظ بذيئة وتحرش وسلوكيات غلط وقلة ادب...وفى النهاية هتتخنق من العيشة وهتتهور على
حد فى الملجا وتيجى الشرطة تاخدك على الاحداث....

وهتخرج من الاحداث مجرم محترف الاجرام

ومع اول حد يمدلك ايده ويطبطب عليك ويراعيك ويطلب منك انت تفجر المكان الفلانى او تهد او تخرب او تسرق او
تقتل مش هترفض لانك ماشوفتش اى حاجة حلوة من الناس دى وماعندكش اصلا انتماء للبلد دى فهتبقى
مستمتع وانت بتعمل اى حاجة تخربها هتحس بسعادة وانت بتأذى الناس

ويطلع واحد فى التليفزيون يندهش ويستغرب ويقول اية اللى بيحصلنا ده اية اللى حصل لمجتمعنا ده اكيد فى
مخطط لافساد البلد دى

لا

ده احنا ما شاء الله علينا عندنا اكتفاء ذاتى قايمين بنفسنا على نفسنا مش محتاجين حد من بره يخرب فينا احنا
بنهد فى نفسنا

بنعمل العملة ونفضل نغلط وفى الاخر نوعد نبكى على اللبن اللى مدلدئ على الارض كالعادة

الاطفال النهاردة مالهمش مكان

لافى بيت

ولا فى مدرسة

ولا فى شارع

حتى الحياة مش متوفرة ليهم

ولا حد حتى مهتم بيهم

يمكن لان مافيش بشر

ها...نفسك ترجع طفل؟

انا اللى نفسى انك ترجع بنى ادم

تبقى انسان


رعاية اطفال الاحداث

معاملتنا مع اطفال الاحداث تدل على اننا مش بناعقبهم على جريمتهم ده احنا
بنعاقب نفسنا


ده الفرد الكبير العاقل البالغ لما يرتكب جريمة بتكون راجعة لاسباب نفسيه او ضغوط او انحراف فى السلوك او ظروف اقتصادية فى اسباب كتير واعذار كتير بنلتمسها للفرد الجانح


مابالك بطفل اية اللى يخليه يرتكب جريمه


اكيد فى اعذار كتيييييرة

وبدل مانعالج الاسباب اللى ادت لكده

لا

بنزود انحرافه بمعاملتنا ليه

وبعدين يكبر ومشاكله تكبر معاه

ونكون عاملنا مجرم كبير

وبعدين نرجع زى كل مرة نبكى على اللبن اللى مدلدئ على الارض ونقول اية اللى حصل لمجتمعنا

مع ان كان فى ايدينا نغير الوضع

كان فى ايدينا نعالج المشكلة وبدل مانخرج مجرم للمجتمع نخرج فرد سوى

*
المفروض الطفل لما يتقبض عليه مايروحش على القسم ويتسجن مع المجرمين
المفروض يروح مكان رعاية متميز مش اى كلام ويوعد مع معالج نفسى هو اللى يحقق معاه ويعرف ليه ارتكب الجريمة ويحلل نفسيته ويحاول انه يخفف من فزعه ويطمنه


**
والمحاكمة ماتتمش فى محكمة عادية
تبقى محكمة خاصة بالطفل
يكون فى محامى الطفل والمعالج النفسى


***
السجن نفسه او المكان اللى الطفل هيقضى فيه العقوبة مايكونش سجن

يبقى مركز رعاية تربوى

اعالج الطفل نفسيا احسن سلوكه اربيه صح

اعلمه ادخله مدرسة او اخليه يتقن حرفة

اعالج السبب او المشكلة اللى بره اللى خالت الطفل يرتكب الجريمة

اامنله مكان بحيث لما يخرج يعرف يعيش كفرد عادى



من الاخر مانتعاملش مع طفل الاحداث على انه مجرم ونساويه بباقى المجرمين

ده غير ان فى اطفال فى الاقسام وداخل الاحداث ما ارتكبوش جريمة اصلا

فى منهم كان تايه من اهله

او طفل عادى شغال فى ورشة

الشرطة بتقبض على اى حد وخلاص مش بتميز

ده غير انهم لما يبضوا عليهم ساعات كتير بيرموهم فى الحجز وبعد فترة بيخرجوهم من غير حتى مايحققوا معاهم

وبتكون النتيجة ان الاطفال فى الفترة دى تأثروا بسلوكيات المجرمين اللى فى الحجز

يعنى بدل ما الشرطة تقوم بدورها

لا

زودت الطين بالة


وافراد الشرطة نفسهم ماعندهمش خبرة فى التعامل مع الاطفال

ده البعض منهم بيتعامل مع البنى ادمين الكبار بوحشية يعنى حتى مافيش ثقافة
عند بعضهم للتعامل مع الانسان مابالك بالاطفال

المفروض يكون فى افراد واشخاص تانين غير افراد الشرطة هما اللى يتعاملوا مع الاطفال

ومكان تانى غير السجون والاقسام يحجزوا الاطفال فيه

ان شالله حتى يعملوا شرطة خاصة للاطفال

هما بقى يهتموا بعصابات خطف الاطفال

واستغلال الاطفال فى اعمال غير مشروعه

وسرقة اعضاء الاطفال

بيع الاطفال

الجرايم اللى بترتكب ضد اطفال الشوارع

لازم يبقى فى رقيب على المواضيع دى

لازم ننقذ الاطفال من سوء المعاملة ومن وحشية بعض افراد الشرطة والعاملين بالاحداث

افراد الشرطة المفروض يكونوا مدربين

او يبقوا بنى ادمين

مركز رعاية الاحداث نفسه لازم اسلوبه وسياسته تتغير

لان اللى بيدخله وهو معرض للانحراف بيخرج منه وهو محترف انحراف

"حسبى الله ونعم الوكيل"